南美自由盃E組最後1輪賽事，榜首嘅巴甲勁旅哥連泰斯，主場迎戰阿根廷球隊CA普拉坦斯。哥連泰斯目前5戰拎到3勝2和不敗，已經提早鎖定首名出線資格，今仗冇必要搏命，預計好可能會輪換陣容，對住穩打穩紮嘅CA普拉坦斯，半場和捧得過。
（HOY TV 76周四早上8時30分直播）文:工廠仔
哥連泰斯喺自由盃係威係勢，但踢巴甲成績麻麻，仲排喺下游位置，喺晉級資格鎖定之後，會集中番巴甲搶分。哥連泰斯近期6日內連踢3場，周一先至1比0小勝明尼路，今場踢完之後，嚟緊周日又要作客甘美奧，今場基本上會出副選比賽，主場出擊都不宜高估。
普拉坦斯作客攞1分都收貨
排小組第2位嘅CA普拉坦斯，依家領先聖達菲2分，今場贏波就肯定出線，就算和波亦有機會保住次名，作客唔會踢得太過冒險，就算攞1分都收貨。CA普拉坦斯踢法傾向保守，往往留前鬥後，連續5場賽事半場打和，近5場自由盃亦有4次開半場和，包括首循環對哥連泰斯半場踢成0比0，不妨再博半場和。