世盃F組賽事，由瑞典對突尼西亞，北歐勁旅瑞典擁有「豪華鋒線」，由阿仙奴射手約基利斯、利物浦前鋒阿歷山大伊沙克合作攻堅，入球能力有保證，首仗遇上同組最弱嘅突尼西亞，正係搶分好機會，勢必主動進攻。不過，瑞典防線不穩，近4場合共失8球，經常出現大比數賽果，近6場有5次總入球開出4球或以上，最好博中位數2.5球嘅入球大。（Now 618、616及688周一早上10時直播）文:Mic少
突尼西亞反擊咪睇小
由英格蘭名帥樸達執教嘅瑞典「頭重腳輕」，「英超三叉戟」約基利斯、阿歷山大伊沙克、安東尼艾蘭加負責攻堅，火力十足，但中後場人腳質素差一截，最有名氣已經要數到中堅域陀連迪路夫，導致表現往往有前冇後，入波同失波數字都比較多，近4仗包括世盃外圍賽附加賽，贏烏克蘭3比1，以3比2擊敗波蘭，日前2場熱身賽同樣踢得好放，分別以1比3不敵挪威，打和希臘2比2，預料會延續呢種豪邁風格。
至於非洲球隊突尼西亞第7次出席世盃決賽周，過去6次都係分組賽出局，名副其實係陪跑分子。不過，隊內現時有唔少球員效力歐洲球會，包括般尼中場米積伯利、法蘭克福中場艾耶斯史基尼，具備不俗反擊力，面對瑞典「豆腐防線」，入波機會相當高。問題係突尼西亞後防亦非常脆弱，日前熱身賽以0比5大敗於比利時腳下，預料難以抵擋瑞典強攻。既然雙方都係有前冇後，有望合演入球騷。